Rovnir
si lo paz diabèt
Rovnir si lo paz akèy.
Témwagnaz.
Po Asèv koz si so maladi la arla inn ti témwagnage
in boug ké mwin la koni dopi li la fine désot lavi, li té abit zis
pa tro lwin ousa mwin té travay, nou la ni dalon, souvan kank mwin
té wa ali nou té koz si so maladi.
Konm li dia mwin la dékouv son maladi inpé tar vèr laz 40 an. Dann son travay
li navé okin problinm li té aminn lafèt é sa san sousi malgré son mèdsin té préviyn
ali lo risk li navé, malgré mové rézilta bann zèkzamin, défwa par pèr lo bann
résilta té fé pa. Lo boug té fé pa in kont sanm son santé manz tout san fé in
kont sanm lagrès, la sos tout té i pas manzé té bon, té invité souvan té anprofit. 10
an la pasé san okin malèz é la li rakont amwin son malèr.
Georges mi rogrèt pa avar suiv konsèy mon mèdsin : Té dopi in sominn mon kor
té pabon bwar dé vèr losikré lo kor i romont apépré. Mi désid prann mon zourné alé doktèr,
la li donn amwin in takon zèkamin po fé, 3 jour apré mi giny rézilta mi sar
war ali. E la lo rézilta té tèlman katastrofik li lo domann a mwin koman mi
fé to tiynbo dobout, mwin té oblizé prann mon médikaman kasé pandan pré in
an,kasé té sifi pi mwin la pas a linsiline. Tout té va de pli an pli mal mon
bann zorgane té vréman an mové léta, La anvoy a mwin war in diabétolog.
Apré avwar suiv amwin 3 mwa apré li anvoy amwin fé in biopsi lo rin , rézilta
: rétinopati sévèr. Détrw mwa apré mwin lé dializé lé la lo kalvèr i komans.
Toulézour mwin lé fatigé, i fo alé lopital 3 faw par somin, é pandan pré 3
zèr i nétway out san. Mon promyé ti blésir sé inn ti zékli dobwa la rant sou
zong san fé espré, sa té géri pi, la koup amwin in falanz, lo nafèr la agarvé l
koup awin lo dwa antiyé. Mi pouré trakont tout sort soz, sat i fé mal lo plis
sé ké kank ou giny pi tous out fanm parsk lo diabèt la tous out nafè é i rédi
pi. Sak li la di a mwin li donnré tout si li pouvé awar in dézinm sans...
In matin mi pas dovan son kaz po alé travay banna i anons a mwin ké li lé mor
dann la nwit sanm in kriz kardiak.