Akèy. 
Akèy alkol.

Témwagnaz. 01

Tout lo kèstyon lé la! po arèt sanm sa lé dir mé konm i di si ou vé ou pé, sé pa sipléman in kètyon de volonté. Pa tro lontan dann o mwa  mé 2007, mwin la koz sanm in boug té lopital sin-Pir, anfin pa po fé sony ali, li la ni anmin son ti marmay po fé in lékzamin. An kozan kozan lo sizé konvèrsasyon la ni si lakol èk son pèrmisyon mi rakont azot in bout son listwar.

Lo boug na la sikantinn léspri sanm lokor fatigé, 20 an sanm bann opiasé (la morfine) anfin konm li di. Dann son péi la Frans laba  li la komans zinn 12 an son promyé zwin, dann son langaz li di lapéti i vyin an goutan. Bann dilèr lé malin ifé aou in pri bon marsé o komansman pokosa? Parsk kan ou komans lé pa sir ou wa inm sa toudswit, apréla zot i pas war ou défwa minm i donn aou inn gratwit po fé gat out bous. O fir amézir ou fé labitid, anfin i pas in bout lo tan po ni dépandan, é konm li di sé la lozafèr i gat. Tout out larzan i pas,  léfé lé pa asé ou mèt lakol ansam po fé monté, de pli anplis lo mank i instal ali é la ou komans mèt lo zwin, lakol, kasé po fé mont lo kor ( mi st arpa lo non bann kasé li la di amwin lo non).

Lo pli dir (sé li ki di) sé ké kan so léfé mélanz lakol, kasé, lozwin i sifi pi, ou lé oblizé pas a dot soz é sé la ké bann dilèr i ariv sanm la poud, la ou rod pa si sé lo bon kalité lo kor i domann fo donn ali. Lo ka lé grav tout sak ou nana ou vann, ou vyin batayèr, ou la pi zami, famy kan vréman lo mank lé for, ou tranm, ou plèr, ou fé kosmar ou la pèr dormi, tansyon ou lèv pi, ou lé konm in mor vivan é ou vandré out lam lo dia po giny inn ti gram.

Po mwin lopital la prann a mwin an sarz, sanm in prodwi po ranplas ladrog (métadone ou sinonsa zot na osi in not prodwi mi koné pi lo non). Po mwin arèt sanm la drog lé pli fasil ke lalkol, la drog lé sèr kan bann dilèr i wa ou na pi vréman riyn alors la ou intérès pi azot.

Mo problinm koméla sé pi bann zopiasé, mé zamal sanm lakol, la sans pétèt i souri pa mwin. Kank mwin té dann mon péi mwin té pa tro intérésé par lakol, ou wa domann amwin pokosa? Bin parsk an krans lalkol for lé sèr plisèr Larénion. Sévré, la drog mwin la rokomansé sanm konyak bourbon, po fini sanm lo rom sarèt,èk lo zamal, mwin la fine fé 3 kir de dézintoksikasyon, la mars in sèrtin tan épila mwin la rokomansé. Mi pans mwin la diminyé, par rapor mon ti marmay é mon madam, lalkol lé po mwin lo pli pir dé drog parsk li lé pa sèr, lé an vant lib, lo pli danzéré minm si lo la arèt 1 mwa ou 10 an in vèr na asé po ou rotonm o pli bas é pli dir po ansort aou. Toulézour mi ésèy bwar mwin mi akros amwin parapor mon ti garson, dann pa lontan mi sava rofé in not kir mi èspèr sar lo bon. Konm bann spésyalis i di sé pa sinpléman in kèstyon de volonté, so ou na in soutyin i viyn ayèr. 

Temwanyaz  2.

Arla in bout listwar in marmay i apèl Alfrèd P, la biyn vouli  mi rakont in bout sak la pasé dann on vi. So promyé vèr li la prann vèr laz 16 an li té bwa pa souvan pars lavé pwin lamoné, o débi konm li di sé lo week end té bwar détrwa kou sanm kamarad dann salon bal. Epi lo nafèr la sanzé dann bann dansing lo pri té tro so, té asté  dann laboutik, i kasiyèt déor lo boutèy i sa ral in gorzé té sar dansé apré.

Apré in sèrtin tan lo kor té fine komans fé labitid sanm lakol, la lété lo zour  la sominn avan alé travay inn ti vèr,épila lo midi in not, lo swar soidizan po kas la fatig in not. Konm i di lapéti i viyn an manzan, pli lo tan i pas plik lakol i rant dann kor pli li domman, an fé atansiyon lo boug lé déza alkolik. Sé konmsa ké lalkol la instal ali ti pa ti pa san vréman ké lo boug té anapèrswa. Podvré sé kanm li la tonm vréman malad sanm in kwit pa posibl an konsiltan on mèdsin ké li la komans konprann, falé arété aboliman  bann zanaliz on mèdsin la fé fé ali, té mont ké té mank pa gran soz po po ké la siroz té trap ali. Apré in kir dézintoksikasiyon é in swivi sanm son mèdsin sikalèr lo boug i tiynbo an éspéran p rotonm dedan...

WebMaster ZORZ
© GEORGES SOUBOU 2007.