Lakol èk bann
granmoun.
Na dé sort lalkolism sanm bann vyé moun, sat la komans avan 65 an é i kontinyé, é sat
i komans apré 65 an. Lalkol sé bann vyé moun lé pa fasil sèrné dési parapor
sèrtin i prann in takon médikaman, épila na in risk mélanz médikaman sanm lakol,
bann médikaman po fé giny somèy tousala.
In takon bann vyé moun i sanpas lakol parapor zot léta maladi,dapré bann zétid
i mont ké bann zétid la té fé si bann moun na plis 65 an dann bann mézon
rotrèt i démont ké dis à 80% abiz si konsomasyion lakol ( bann sondaz lé fé dann
plizir mézon rotèt lo bann rézilta i bouz in bonpé.
Po in granmoun alkolik swa li lé in gran konsomatèr dopi laz 25, sinonsa li
na in konsomasyion parapor son vi, son léta mantal, sinonsa koud-kony li giny
dann la vi (mor, san okin moun dann la vi...). Epila in gran konsomasyion lakol
si in pèrsonn azé i fé ké si li lé malad son sistinm dann son kor lé pi kapab
protèz ali, si li na lo mwindr maladi lé difisil po géri é in takon maladi
i atak ali (méwar, lo kèr, ipèrtansyion, siroz,maladi lo fwa, si li prann médikaman
na in risk pli inportan parapor mélanz lé mortèl....) Sak péi na bann
ganmoun i bwa , lé otan pli grav si zot i viv tousèl san pèrsone akoté zot,
i pé fasilman tonm dann in koma, tonbé é pi giny lévé, na in takon zafèr i
rant anpar.
Isi Larénion kaziman tout bann granmoune i bwar zot ti koutsèk,minm malgré la
maladi tousala. Mi diré sé in kèstiyon de mantalité, é tradisiyon, lé dir de
domann in viyé moune isi arèt définitivman, si vréman i giny pi alor la i arèt.
Nout bann granmoune té bwar mi diré de fason rézonabl, par rapor bann domoune
koméla. An fézan paz la mwin lakoz de lakol ansanm bann viyé moune la é ékout
azot kozé de lalkol mwin la pi tir inn ti konkliziyon.
Bann viyé la i di anski konsèrn lalkol in lo distilasiyon té pa parèy, é zot
té bwar zot ti kou lo swar an sortan travay, zot travay té domann bonpé lénèrzi
dopi lo matin ziska lo swar. Zot té bwar pa tout la zourné po lo pé lalkol
konsomé navé bonpé dépans, lété osi in kèstiyon finans navé pwin po abizé.
Koméla modèrnité, travay fasil, asistana de Léta, i rann la vi pli fasil konsomasiyon èksésiv
po in rézilta katastrofik.
WebMaster
ZORZ
© GEORGES SOUBOU 2007.